يا بلحسن ضاك صدري والحشه حامي
من جور دهري عليَّ ابسطرته حامي
مامن مجيرن سواكم للدخل حامي
هل يوم كلت يحيدر حرفتي والحيل
والسمع مني ذهب بعد الظهر والحيل
عني توانو جفوني خلِّتي والحيل
وامسيت جتَّان ياحامي الحمة حامي.
-------------------------------------------------
وحك التين والزيتون والمن
اجروحي الطابن امن اسنين ولمن
السدر والجفن والكافور والمن
كَبل طرت الفجر يسرون بيه
-------------------------------------------------
يا صاح عودي ذبل وبكل دوا مايصح والدمع سال وجره من ناظري ما يصح
والنيب مثلي ابحنينه لو صحت ما يصح
من حيث مضروب مابين الجوانح تبن
بمعالج الروح سري لم اموتن تبن
لا تنهضم عل سبع لو صار علفة تبن
واليوم حتى التبن علف السبع مايصح
-------------------------------------------------
جم دوب أهج هاج ما جن الذرى ولفاي
امهجول ولا عاود الديرة هلي ولفاي
ما اطلب اديارهم طاري الفلا ولفاي
هايم بالوهاد من يوم النوو بالراح
مذهول مذعور حاير بس ادكَـ بالراح
جنة وجانوا وجان إلنه الهنا والراح
لا جنه جنه ولا جنهم كَبل ولفاي
-------------------------------------------------
دار الملوك اظلمت عكَب الضوة بسروج
يهناك دمعي يكت إعله الوجن بس روج
والخيل لمن تردَّت واضلعت بسروج
والكدش اصبح لها عزمٍ شديد وباس
والزين دنَّكَـ على جف الزنيم وباس
والشهم لو عاشر الأنذال ما هو باس
من جلَّة الخيل شدو عل جلاب اسروج .
-------------------------------------------------
جم دوب أدافع عواذل ياخلكَـ بالهوش
حتى دعوني شبيه السارحه بالهوش
لا جان هذا ابضميري لا ولا بالهوش
من حيث إذاني دعوهن من حجيهم طرش
لا خط لفاني ولا جدمي عليهم طرش
ياحيف نكَضي العمر ما بين وادم طرش
لو تلزم اذنة لزم لو ما يكَف بالهوش !!
-------------------------------------------------
آنه الذي اليوم عودي من الحجي منجلي
يامالك الروح أبكَه الياوكت منجلي
وما بين الأنذال أصبح ما هو كوتي ايصير
واللي عكَبناه عنه يمتنع ويصير
آنه الذي دوم اسمي بالحصاد ايصير
ومن جور الأيام أصبح منجسر منجلي
-------------------------------------------------
أهل هل وكت بالك تمن بيهم
إدنان وعيب يحصل تمن بيهم
ثلاث من الخصايل تمن بيهم
الجذب والفتن والشوفة الردية
-------------------------------------------------
يعاذل نار شوكَي هل تمسني
إهديني الشوف حبي والتمسني
بجه من مد يمينه والتمسني
لكَاني نفس ما مش جسد بيه
-------------------------------------------------
الزمان وي الجواد بسكَم كَصرن
ويبني بيوت للأنذال كَصرن
الكَصير يطول وال بي طول كَصرن
الصكَر يطلب من البومة هديه !
-------------------------------------------------
أنه بدنياي عيبن شفت راحات
أو علي مرت ليالي العسر راحات
أجيبن هاي كَالوا ذيج راحات
أخافن بالقيامة ذيج هيه !!
-------------------------------------------------
نحل جسمي وتظل روحي تعالي
هبطنه والنذل بينه تعالي
يجارة الدهر ما انصف تعالي
نخلط همومنا ونجسم سوية
-------------------------------------------------
وحكَـ المرتضى إيمامك وإما ماي
عبيط الدمع لفراكَك وما ماي
هوه الناكَه لفة خلفي وما ماي
الهوة مدري لوين ايريد بيه
-------------------------------------------------
آنه انشر للهوه وما طلع حباي
ومن ضعفي غديت انحيل حباي
لون غير الحمام ايصيب حباي
عتبت ولا عتاب اعله المنيه
-------------------------------------------------
إجبود ابجمر من الوكت ملت
وكَلوب الناس من الهجر ملت
مرابط خيلك من الخيل ملت
وبيض اسيوفكم امست صديه
-------------------------------------------------
من هل بله جاني المرض
ويطول حجيك ويعرض
لا تنشد الخالي الغرض
انشد ال بالشوكَـ ابتله
-------------------------------------------------
ما حلب وياي صافي
وعكَبه جفني موش غافي
آنه علمته القوافي
ومن تعلمها هجاني
-------------------------------------------------
نحل جسمي وزاد اليوم مرضاي
على اللي ما شفت له شخص مرضاي
لو بات الترف بحشاي مرضاي
اكَله اكَرب يهل مبعد عليه
-------------------------------------------------
بعض المسامي يصير ادغارهم من تره
ما يصح كفاف مكنهم للدمع من تره
تجاه المعادن تره من تنشذب من تره
مانيش مليوم بس اتبع وراهم وصف
تعبان ظليت بيهم بس اجتف وصف
ذجر المعيدي يفيدك من تتبعه وصف
بيه اكتفي من تسمعه خير الك من تره
-------------------------------------------------
من عكَب زين المحاجي عاد سلتنه
صرنه خلف ماتفيد السيف سلتنه
من فوكَـ هذا الضعف دنياك سلتنه
يهل الهوه ممتحن كَلبي خذوني لكم
لو تنستر دمعتي بيدي ابجفاكم لكم
عفنه العنب ما نريده يارفاكَه لكم
لاجن نباري بعد وانريد سلتنه
-------------------------------------------------
ياكَلب لا تنهضم او تكَضي العمر وانتهم
بهواك اون بونين السمع وانتهم
من دون اهل الهوه آنه ابتلي وانتهم
مالي صديجن تألملي ولا لي صاح
جاني ايتغطرف كَلت سكران لا لا صاح
هميت امد ايدي اعله خده صاح
وانزعج واغتاض مني وكَال الي وانت هم
-------------------------------------------------
ثوب العليه ركد وأمسه بوجدك وصل
والهم لملم جموعه وجر عليه وصل
جانون هجرك دوه البين الجوانح وصل
اشجيلك الحال حال ايوب حالي وارد
لاجن يهون عليه يوم خطك ورد
وآني أشبهك لموسى العاد لمن ورد
لو ثوب يوسف لعد يعكَوب لمن وصل .
-------------------------------------------------
وحك التين والزيتون والمن
اجروحي الطابن امن اسنين ولمن
السدر والجفن والكافور والمن
كَبل طرت الفجر يسرون بيه
-------------------------------------------------
من مثلي بالناس توحش روضتي وحدي
وبزموم الهموم بيهن طوحت وحدي
أومي لهم كل مسا لابد كَعود او جزر
والزمن كلّه انفنه ما بين مد وجزر
دمعي الخلكَـ شبهت لو سال مد وجزر
عكَب السراجين بالظلمة صرت وحدي !!
-------------------------------------------------
ياصاح بيضة ودادك ما وراها صفر
شنهو البذانك عليَّ من العواذل صفر
معتدل لونك ولوني من التجافي صفر
ينبيك حالي وصل للموت واشرافه
إي والسما والعرش والبيت واشرافه
عندي من اشوفك هلال العيد واشرافه
هاي المروة من اجيك اتكَول هلهل صفر
-------------------------------------------------
من يوم فركَاك جسمي من صدودك عود
هيهات عكَبك يسليني نديم وعود
كلما اعذل النفس روحي تكَلي عود
لي صاحبن كَط محد كَال إله لوله
وحياة من بالمهد جبريل اله لوله
لوما يكَولون واعرف بالحجي لوله
جنت احجي وياك لاجن بالزبيبة عود
-------------------------------------------------
يا صاح لي ونتن يعكَوب ما ونَّها
ومن الحبيب انصبت بسهام ما ونها
يازي التجافي دبين لي الصدكَـ والنها
من حيث ان الخبر كل الخلكَـ شمته
واللي يعارج خصم اعله الجتل شمته
انكر ودادي وبيه اشجم خصم شمته
بالجير وياي ما طعت العذل والنهى
-------------------------------------------------
جم دوب أهج هاج ما جن الذرى ولفاي
امهجول ولا عاود الديرة هلي ولفاي
ما اطلب اديارهم طاري الفلا ولفاي
هايم بالوهاد من يوم النوو بالراح
مذهول مذعور حاير بس ادكَـ بالراح
جنة وجانوا وجان إلنه الهنا والراح
لا جنه جنه ولا جنهم كَبل ولفاي .
موضوع: مختارات من زهيريات و أبوذيات الحاج زاير 
السبت مايو 03, 2008 7:34 pm
